Gumii Paarlaamaa Oromoo

New Page 2 home

Seife Nebelbaal

Gaazexaan Seife Nebelbal seenaa preesii walabaa impaayera Itoophiyaa keessatti bakka ol’aanaa kan qabduu fi saba biratti danuu kan jaallatamtu dha. Yeroo rakkisaa gaazexaan kun itti maxxanfamaa turte keessatti, gaazexaa kana qopheessuu qofa osoo hitaane, gaazexattii dubbisuun illee akkaa yakkaatti lakkaa’amee, hojiidhaa nama ariisisaa, nama hiisisaa akkasumas gidiraa lakkaa’amee hindhumne akka inni namarraan ga’u warri gaazexittii beekan beeku.

Yeroo rakkisaa sana keessa, rakkina ittidhufaa ture hunda dan’da’uudhaan, saba isaaniif dungoo ta’anii, hidamaa, reebamaa ture qopheessitootni gaazexaa Seife Nebelbaal kan isaan gaazexaa qaawwaa odeeffannoo dhugaa saba Oromoo taate kana qopheessaa turan. Haalli rakkisaan mootummaa Itoophiyaa ittuma caalee humnaa ol yeroo itti ta’etti gaazexeessitootni lubbuun isaanii gidiraa mootummaa Itophiyaa irraa hafe qe’ee isaaniif biyya isaanii dhiisanii kolugaltummaadhaan baqattoota biyya ambaa ta’uudhaaf dirqisiifamaniiru. Aarsaa gaazexeesitootni kun baasanis kan seenaan Oromoo yoom illee hin dagatne dha.

Haa’ta’u iyyuu malee, maqaa gaazexaa seena qabeettii kanaa uffachuudhaan, seenaa gaazexeessitootni Oromoo kun gatii ittibaasaniin bu’aa argachuuf yeroo tattaaffiin ta’u guddaa nama gaddisiisa. Maqaa gaarii gaazexattiin qabduu fi aarsaa gatii jabaa gaazexeessiftootni Seife Nebelbal jireenyaisaaniitiin kaaffalaniin yeroo nagadamu garaan keenya gaddaa fi aariitiin madaa’a.

Gaazexaan Seife Nebelbal, bara itti odeefannoon dhugaa birqii ture, hojii presii saba Oromoo irratti xiyyeeffate qopheessuun immoo bara itti akka cubbuutti lakkaa’amu, bara 1993 keessa Dhaabbata Maxansaa fi preesi Israel Sobooqaatiin seeraan beekamee Ministeera Daladalaa fi Ministeera Beeksisaa Itoophiyaatti galmaa’uudhaan eyyamni preesii ba’ee maxxanfamuu jalqabe. Hamma gaafa qopheessitootni ishee gidiraan itti baayyatee humnaan oli itti t’eetti gazexaan Seife Nebelbaal guutummaa biyyattii keessatti rabsamuudhaan madda odeeffannoo dhugaa taatee turteetti.

Dhaabbatni Maxansaa fi Preesii Israel Sobooqaa (Isreal Soboka Press and Publishing Enterprise) seeraan kan galmaa’e abbaa gaazexaa Seife Nebelbal si’a ta’u maqaan gaazexittiis seeraan galmaa’ee kan beekamu maqaa dhuunfaati. Gaggeessaan dhaabbata presii kanaa fi gulaalaan gaazexaa Seife Nebelbal akkuma warri gaazexittii beekan hundi yaadatan Obbo Israel Soboqaati.

Gulaalaan gazexattii fi qopheessitootni ishee hundi, biyya ambaa jiraatan keessatti hamma haalli isaaniif mijatetti hojii saba oromoof bu’aa qabu kana, kan aarsaa guddaa itti baasanii asiin ga’an kana, halli biyya ambaa yoo baayyee mijachuudhaa baate iyyuu bifa fooya’aa ta’ee fi bifa ittiin saba keenya guutumaa addunyaa irra faca’ee jiru qaqabuu danda’uun itti fufuuf qophii barbaachisaa ta’e xumuraniiru.

Yeroo gabaabaa keesatis karaa fuula marsaa interneetii www.seifenebelbal.com fi kara reediyoo Seife nebelbal tajaajila isaa ittifufuuf guyyaa yartutu isa hafe. Garuu “ utuu isin bira hinga’iin isin dursine” jechuudhaan namoota maqaa keenyaan tamsaa raadiyoo jalqaban arguun keenya guddaa nugaddisiiseera. Namoota kana godhan nuti quba hinqabnu. Kaayyoo dhokataa isaan fudhatanii ka’anifis Dhaabatni Presii fi Maxxansaa Israel Soboqaa akkasumas qopheesitootni gaazexaa Seife Nebelbal ittigaafatamoo akka hintaane beeksisa.

Madda odeefannoo gaarii ta’uudhaan kan saba keenya tajaajilaa jirtan Gadaa.com fi Ayyantu.com dalagaa seeraa alaa namootni “Radiyoo seife nebelbal” jedhanii jalqaban kanaan utuu addaan hinbaafatiin keessumsiisuu keessaniif gadda guddaa nuti dhaga’ame ibsaa websaayitoota keessan irratti bakka laattaniif ariitiidhaan akka kaastan kabajaan isin gaafatna.

Mirgaa fi haqa saba Oromootiifan hojjedha kan jedhu dhaabatni preesii kam iyyuu jalqaba mirgaa fi haqa ilmaan oromoo eeguu isaa ofgaafachuu qaba. Mirga dhaabbata preesii tokkoo dhiitaa preesii walaba ta’e gaggeessuun hindandda’amu.

Nagaa wojjin

Israel Sobooqaa Sa’o

Dhaabbata Preesii fi Maxansaa Israel Soboqaa

Gulaalaa Seife Nebelbal

Israel Soboka <israel1994@hotmail.com>