Gumii Paarlaamaa Oromoo

Amma iyyuu Mooraan Qabsoo Oromoo Lukkeewwan irraa Qulqula’uu Qaba:

Ummata ofii diina jalatti gabromee jiru utuu arganii mataa gadiiqabatanii jiraachuun salphina guddaa dha. Qabeenya ummata keenyaa diinni humnaan saamee nyachaa waayta jirutti, maallaqaaf i qabeenyuma Oromoo keessaa waan diinni qunxuree isaaniif kennutti qabsoo fi saba ofii gurguratanii diinatti galuun ammoo salphina salphina caaluu dha. Lammiin saba isaa diinaaf saaxilee ummata isaa ganu kami iyyuu egereen isaa ykn dhumi isaa gaarii hin ta’u Kabaja hin qabu, seenaan isaa xura’aa dha. Dhuma irratti saaxilamee qullaa dhaabbata. Gantuun yoom iyyuu eessatti iyyuu kabaja hin qabdu.

Ergaan diiggaa mooraa qabsoo Oromoo keessatti kan jalqabe bubbuleera. Murni Wayyaanee, TPLF, mooraa qabsoo Oromoo keessatti hojjechaa akka turee fi jiru ifatti dubbachaa ture. Maallaqa doolaara miliyoona 86 ramadee hojeechaa jiraachuun erga dubbatamee tureera. Maallaqi kun baasii caasaa “Diaspora Directorate ” jedhamu keessaan namoota garaa isaaniif bulan ittiin bituuf akka ta’e illee dabalamee ibsamee ture. Waayyaneen Qinijjitiin akka Shunkurtii ququnciftee fixxe Oromoodhaaf raftee hin bultu waan ta’eef mooraa qabsoo tiksuun, tokkommaa qabsaa’ootaa tiksuu murteessaa dha dhamsa jedhu Gumiin Paarlaamaa Oromoo dabarsaa turuun isaas dagatamuu hin qabu.

Maddi jeequmsaa fi diigumsaa ergama diinaa of keessa qaba, kanaafu qabsa’ootni dhugaa lagaa fi amantiin wal qooduu irra kaayyoo irrati cichuun lootee seentuu of keessaa caalaluun barbachisaa dha dhaamsa jedhuuf deebin ture, “qabsootu qancare, laga abaluufaatu baleese... malee ergaan diinaa nu keessa hin jiru’ kan jedhu ture. Dhugaan jiru garuu haa xinnaatuu haa guddatuu dirree qabsoo caalaa diaspora keessatti balaa Oromoo diinaaf saxilu guddaatu mul’ataa ture, mul’achaas jira. Haqi qallatee sobi babalatee, farri qabsoo goota of fakkeessee, wallaalaan beekaa ta’ee beekaan wallaalaa ta’ee, ayyaan-lallattooti faarfamanii abbaa fi firri qabsoo farra taasifamanii namoota sab-bonummaa Oromoo gadi dhaaban irratti duulli maqa- baleessii lagaa fi naannoon irratti geggefamaa turee fi amma illee hin dhaabbatin jira waan ta’eef xiqqoo dhabbannee itti yaaduun baayyee barbaachisaa ta’ee jira. Akeeki wayyaanee fi farreenii Oromoota beektotaa fi sabboontota sabboonummaa Oromoo gadi dhaabanii fi dhaaba qabsoo bilisummaa bu’uuressanii sadarkaa guddaa iraan gahan duula maqa balleessii irratti geggeessuun miseensaa fi uummata biratti fudhatama akka dhaban taasisuu yaaluu dha. Kanattis hanga tokko milkaawaniiru. Bu’uuressitooti dhaaba bilisummaa Oromoo fi beektoti Oromoo duula ololaa keessaa fi alaan oofamu hifatanii adeemsa jiru halaala irraa qasuu qofa erga filatanii bubbuuleera. Olola diinni oofu caalaa kan keessaan oofamutu harka caalee argame. Ololli mooraa qabsoo Oromoo keessatti demsifamaa bahee fi jiru sabboontota Oromoo adda qooduu irratti qooda guddaa gumaache.

Diinni keessaahuu biyya alaa keessatti baroota dhihoo as Oromoota gandaan qooduu bal’inaan itti jira. Media Oromo fakkaatani halkanii fi guyyaa kanneen dhaabota Oromoo fi qabsaw’ota Oromoo balaleefachuu fi qoqqoduu qofa irrati fuulleffatan gaheen isaanii maaal akka ta’e hundi of gaafachuu qaba. Mooraa qabsoo Oromoo kan diigaa ture namoota 7 amma diinatti galan qofa jeedhanii yaaduunis gowwummaa dha. Sababi isaas amalooti gantoota diinatti galanii amma illee mooraa qabsoo Oromoo keessa akka jiran beekuun fardii ta’a. Namooti dhaaba keessatti gaafatama ol aanaa irra turanii fi amma gananii diinatti galan namoota akkamii turan? Yoom, akkamitti sadarkaa hooggana olaanaatti filamuu danda’an? Ulaagaa isa kamiin? Jedhanii gaafachuunis barbaachisaa dha.Tarsiimoo kana filachuu keessatti dogoggora uumameef hoo eenyutu itti gaafatama?Kunis waan deebii argachuu qabu dha. Har’a hoo mooraa qabsoo Oromoo keessatti maaltu deemaa jira? Har’a illee kanneen waa’een tokkummaa Oromoo ennaa dubbatamu akka heexoo itti hadhaawu, waa’een tokkummaa qabsaawotaa yeroo ka’u gurra achi qabatan, waa’ee garaagarummaa malee waa’ee tokkummaaa hin dubbanne, gochaalee mooraa qabsoo haphisanii fi sharafan dalaguu malee waan gaarii hojjechuun seenaa gaarii hin qabne akka jiran beekuun barbaachisaa dha. Akka summii qaama namaa seenee yookaan akka gandii saawwa soofee fixuu dhaaba Oromoo biyyoolessaa fi guddaa soofee fixaa
jiru, dhukkubi guddaan akka keessa jiru namaa galuu qaba. Kana duubas diinni jiraachuu akka danda’u qormaata baayyee gochuu hin barbaachisu;Wayyaneen Diaspora Directorate” jettee biyya alaa keessatti caasaa
; uddaa diriirstitee maallaqa raabsaa jirti. Hojiin isaanii inni duraa jaarmayaa Oromoo biyya alaa jiru tasgabbii dhorkuu fi diiguu dha.

Gummin Paarlaamaa Oromoo Mooraa qabsoo diiguuf diinni maallaqa guddaa ramadee nu facaasaa waan jiruuf qabsaawti Oromoo kaayyoo isaanii fi qabsoo isaanii tiksuun diina akka of irra qolatan yeroo adda addaa waamicha dhiyeessaa ture. Keessattuu miseensoonni Paarlaamaa Oromoo naannoo Keeniyaa turan laga walq qoqooduun deemaa jiru kessa harki diinaa akka jiru ibsuun, furmata akeekuun, kun ta’uu baannaan balaa dhaqqabuu danda’u tilmaamanii dhaamsa dabarsaa akka turan qaamotiin dhimmi ilaalu ni beeku. Waan nu gaddisiise keessa inni guddaan garuu hooggnni qabsa’oo Oromoo farreena qabsoo adda baafatanii beekuu dhabuu isaanii caalaa iyyuu jaala qabsoo dhugaa waliin deemaa jiran adda bafatani beekuu dhabuu isaanii ti. Warqeen harkaa qaban sibiila isa jedhan ta’ee qabsaawota qabsootti bilchaatanii fi kaayyoo isaaniif amanamoo ta’aniif ilaalcha gahaa kennuu dhiisanii namoota akka ririmaa fi qiinqanii jaarmayaa nyaatanii fixan dhaadhessuu fi ol fuudhanii muka yaabsisuutu kanaan nu gahe. Wal kabajuu fi seenaa walii katabuu irra seenaa walii xureessuu fi wal xiqqeessuu, akaksumas hamachuu keenyatu farreenii fi diinaaf karaa saaqe. Rakkoon jiraachuu osoo agarruu yeroon gamaaggama goonee waan dabe qajeelchuu dhadhabuu keenyatu gara dhabamaatti nu geessaa jira

Dhaamsii keenya inni guddaan mana ofii osoo inni hin badin eggachuu, rakko dhalatuuf ammoo murtii keessa a deebi hin qabne keenaanfii hojii fuladura jiru hojjechaa deemuu malee waan darbe odeesaa oluun oduu hojii goodhachu ta’aa. Kanneen jaaramyan Oromoo yeroo hunda jeequmsa keessa akka jiraatuuf shira dalagan irratti dammaquun barbaachisaa dha. Qabsoota dhugaa fi kan afaanii adda baafannee beekuun fardii dha. Amma illee mooraa qabsoo keenya qulquleesuuf dura foon suma’ee fi foon fayyaa adda caalaluun jaarmayaa fayyaalessa summiin diinaa keessa hin jirre, qabsoo’ta dhugaa kaayyoo fi
qabsootti cichan qofa akk ahammatu taasisuun waan yeoon gaafatu dha.Of qulqulleessine qaawwaa diinni ittiin nu seenuu danda’u ulaa keenya haa cufannu.Kan gochuun mooraa qabsoo Oromoo cimsuun galii keenya gahuu dhihootti dandeenya.

Bilisummaa ummataa Oromoof
Gummi Paarlaamaa Oromo

Amajjii 26/ 2010